om tat sat

भगवंत अर्जुनाला सांगतात कि सात्विक कर्म केल्याने मोक्षाच्या गावात प्रवेश होतो हे खरे आहे ,पण' ओम तत सत 'या ब्रम्ह नामाच्या निर्देशाने भक्ताला भगवंताशी एकरूप होता येते .

ओम तत सत हा तीन प्रकारे ब्रम्हाच्या नावाचा निर्देश श्रुतीने सांगितला आहे .या नामाच्या योगानेच पूर्वी प्रजापतीने ब्राम्हण ,वेद व यज्ञ निर्माण केले .

परब्रम्ह हे नाम रूप रंग रहित आहे ,मग अविध्येच्या अंधारात सापडलेल्या जनांनी ब्रम्हास ओळखावे म्हणून श्रुतींनी ही खुण  केली .जीव व ब्रम्हाचा अनादिकालापासुनचा अबोला फिटावा व ब्रम्ह जीवास अद्वैतपणे भेटावे म्हणूनवेद रुपी  बापाने हा नाम मंत्र शोधून काढला .या एका नावाने ब्रम्हास हाक मारली असता ते अदृश्य असूनही गोचर होते .

तरि अनादी परब्रम्ह ।जे  जगदादी विश्रामधाम ।त्याचे एक नाम ।त्रिधा असे ।२८ अ १७ 

वेदरूपी पर्वताच्या शिखरावर असलेल्या उपनिषदांच्या अर्थ रुपी शहरात जे परब्रम्हाच्या पंक्तीला आहेत ,त्यांनाच ते कळते .

तरी सर्व मंत्रांचा राजा ।तो प्रणवो आदिवर्णु बुझा ।आणि तत्कारु जो दुजा ।तिजा तत्कारु ।४२ अ १७
जेंव्हा सात्विक कर्म या नामाला मिळून चालते तेंव्हा ते मोक्षाला घरचा चाकर करते .
ज्याप्रमाणे तेल वात व अग्नी ही एकत्र आली असता दिवा लावण्याची युक्ती माहित नसेल तर प्रकाश पडणार नाही ,त्याप्रमाणे योग्य वेळी योग्य कर्म योग्य मंत्रोपचारासाहित केले तरी त्याबरोबर या ब्रम्ह नामाचा विनियोग केल्यानेच ते कर्म ब्रम्ह फलास योग्य होते .
सात्विक पुरुष कर्मा चरणाची सुरवात ध्यानाने व वाचेने ओंकार सिद्ध करून करतात -मग अरण्यातील वाटाड्या प्रमाणे ओंकार या कर्माचा सोबती होतो व कर्म निर्विघ्न पार पडते .या क्रिया जेंव्हा फळामध्ये प्रवेश करू लागतात तेंव्हा ते पुरुष तत शब्दाने निर्देशित होणार्या ब्रम्हाला फलासाहित कर्म अर्पण करतात .आता हे ब्रम्हरूप झालेले कर्म व कर्ता यात भेद राहतो ,म्हणून कर्ता  स्वतः ब्रम्हरूप होऊन पूर्ण होण्याकरता सत अक्षराचा उच्चार करतो. या सत शब्दाच्या उच्चाराने आणखी एक गोष्ट होते म्हणजे सत्कर्मे करताना काही दोष राहिला असेल तर तो नाहीसा होतो
या सत शब्दाने असत पदार्थ मात्राचा पूर्ण निरास होऊन ब्रम्हाचे निर्दोष रूप दाखवले जाते .
ज्याच्याकडून हे सर्व दृश्यमान जग प्रकाशले जाते त्या ठिकाणी ओम तत सत हा मन्त्रो च्चार नेतो ,म्हणून हे तीन अक्षरी नाम केवळ ब्रह्मच आहे .